Tuesday, September 07, 2004

Hún Ingibjörg og annað röfl

Hahahaha!!! Sáuði hana Ingibjörgu Sólrúnu í fréttum Stöðvar 2 sl. laugardag? Skemmtilegt nokk, sko. Hún talaði um hvað það væri agalegt að Síminn hefði keypt stóran hlut í Skjá einum. Hún talaði um að það væri sko engan veginn í samræmi við fjölmiðlafrumvarpið sem Sjálfstæðisflokkurinn hefði sett fram fyrr á árinu... er það slæmt að mati Ingibjargar Sólrúnar? Ef ég man rétt var hún eitthvað á móti frumvarpinu, var það ekki? Ef ég man rétt var frumvarpið líka tekið af dagskrá og varð ekki að lögum, við talsverðan fögnuð Ingibjargar og hennar manna. Svo þegar þetta viðskiptafrelsi, sem vinstri menn urðu allt í einu (furðulegt nokk) talsmenn fyrir, kemur einhverjum að notum verða vinstri menn, bæði Samfylkingin og VG urrandi vitlausir. Endilega ákveðið ykkur hvar þið standið.
Nú var Ögmundur líka í fréttum, dýrvitlaus á öllum sjónvarpsstöðvum og dagblöðum, því maður nokkur hafði verið borinn út með lögregluvaldi úr leiguíbúð á vegum borgarinnar. Fór Ögmundur mikinn, talaði um að maðurinn væri jú fatlaður og eitthvað, sem hefur væntanlega verið ástæðan fyrir að hann fékk félagslega leiguíbúð til að byrja með, og svoleiðis fólki mætti ekki henda á götuna. Það sem ekki fylgdi sögu Ögmundar er að maðurinn var ekki búinn að borga leiguna í vel á þriðja ár og var margbúinn að fá viðvaranir og hafði m.a.s. verið boðið að ef hann færi nú að greiða leiguna, eins og hann jú á að gera, yrðu felldar niður skuldir hans sem voru 24 mánuðir...TVÖ ÁR!!!
Manni finnst stundum yfirlýsingagleði VG-forkólfanna bera vott um gríðarlega örvæntingarfullar atkvæðaveiðar á miðum þeirra sem minna mega sín og vilja kenna stjórnvöldum um allt. Sjálfur var ég býsna fúll að lesa í blaðinu að manninum hefði verið boðið þetta, ekki gaman að sjá að skattfé mitt sem og útsvar borgarbúa fari í að borga íbúðarleigu fyrir manninn. Ef maður af einhverjum ástæðum hefur ekki efni á að leigja íbúð þá leigir maður jú bara herbergi, sem hlýtur að vera ódýrt hjá borginni því leigan á íbúðinni - sem umræddur maður einmitt borgaði EKKI - er 14,500 kr. á mánuði!
Að lokum langar mig að beina einu til sjónvarpsmanna á Poppvíti - læriði íslensku, hálfvitarnir ykkar! Sumir þarna virka sem þeir hafi ekki einu sinni nógu háa greindarvísitölu til þess að komast á atvinnuleysisbætur! Sá sem kynnir vansældalistann sagði nefnilega í dag (svona fyrir utan allar málfræðivillurnar sem dagskrárgerðarmenn dæla yfir æsku landsins, er hann var að tala um Sugababes; "Lýstu þær því yfir að þær langaði mikið að leika í Asíu, því ÞAR Í LANDI væru tónleikagestir..."
Það er greinilega ekki nóg að hafa aflitað hár til að fá vinnu á Poppvíti, það hjálpar að vera heiladauður.

5 Comments:

Anonymous Anonymous said...

Mér þykir leitt, mín vegna, að vera að svara þessari vitleysu í þér, litli óþroskaði bróðir, sem heldur með sjálfstæðisflokknum, sem reyndar hefur á að skipa einhverju því ósjálfstæðasta fólki ever, þvi þetta bull er varla svaravert!
Það er verið að tala um hvort Síminn, í eigu ríkisins, eigi að vera að skipta sér af fjölmiðlarekstri yfirleitt en eins og þú kannski hefur fattað eru ekki allir hlynntir því, hvar í flokki sem þeir standa og verið að bauna á Geir Harða plebba úr öllum hornum og flokkum.
Skattfé þitt fer nú að talsverðu leyti í að borga örorkubætur og annað þvílíkt því ekki hafa allir séns á því að vinna á daginn og leika sér um helgar fyrir péninga eins og þú, væni.
"Hver er sinnar gæfu smiður" á nefnilega ekki við um alla og það er stutt milli feigs og ófeigs, hvort sem um slys eða veikindi er að ræða og þarf ég ekkert að minna þig á það, eða er það?
Skilaboð Ögmundar, sem er einn albesti stjórnmálamaður landsins, eru þau að samfélaginu ber skylda til að hugsa sómasamlega um þá sem eins og þú segir "minna mega sín" og skiptir þessi krabbameinssjúki kall ekki höfuðmáli í því, hann er bara dæmi.
Ef enginn veitti þessum hálfvitum, sem hugsa bara í tölum, og þú að sjálfsögðu kýst, aðhald, þá væri lífið bara andskoti skítt fyrir býsna marga, væni minn.
"Manni finnst stundum yfirlýsingagleði VG-forkólfanna bera vott um gríðarlega örvæntingarfullar atkvæðaveiðar á miðum þeirra sem minna mega sín og vilja kenna stjórnvöldum um allt", segir þú en það þarf svo sem ekkert að fara á atkvæðaveiðar "á miðum þeirra sem minna mega sín" eins og þú kýst að kalla samborgara þína sem hafa orðið svo óheppnir t.d. að lamast eftir bílslys eða orðið fatlaðir eftir að hafa fengið skæða heilahimnubólgu eða eitthvað og er þá ekki bara best að slaka þessu pakki í herbergi einhversstaðar út í bæ, kannksi t.d. í Fellunum þar sem 60% íbúða er á vegum féló. Leigan ekki svo dýr, kannski 20 kall á mánuði sem samt er nú um 30% af "launum" eða bótum sem eru oft milli 80 og 90 þús á mánuði, brúttó.
Allavega ekki hafa þessa sjúklinga og "minna mega sín fólk" í miðbænum fína því þetta pakk á hvort sem er engan pening til að eyða í hljóðfæri eða brennivín á pöbbnum. (öryrkjar sem hanga á pöbbum eru yfirleitt heimilislausir, væni minn, og það er ekki yndislegt, svo mikið veit ég).
Þessi leiga var einhver x upphæð, 14,5 þús eins og þú segir eða ég veit ekki hvað, eftir húsaleigubætur. Húsaleigubætur þýða og að ekki er hægt að sækja um bætur annarsstaðar og maður þarf samt að punga út 25 að 30 kalli fyrst áður en maður fær þessar bætur.
Ég skal þó vera hjartanlega sammála þér með að íslenskukunnátta sé léleg hjá börnunum á popptv sem og greindarvísitala þeirra sennilega töluvert fyrir neðan 70 (sem eru mörkin við þroskaheftun).
Ég get þó sagt að ég hætti að vinna á pöbb þegar dyravörðurinn sem átti að standa vaktina með mér sagðist vera orðinn þreyttur á þessu, hann hefði td unnið sex helgar í október!!!!!
Fokkjú svo og eigðu góða viku.
Arnmundur VG.

11:56 AM  
Anonymous Anonymous said...

Var Síminn ekki búinn að kaupa Skjá 1? Allavegana búinn að borga hann fyrirfram.

12:17 PM  
Blogger Pippi said...

Popp Tíví leggur sig líka fram að flestu leyti við að vera Braindead. Nema strákarnir í 70 mín. Þeir eru skemmtilegir.

2:09 PM  
Anonymous Anonymous said...

This comment has been removed by a blog administrator.

11:44 AM  
Blogger Ingvar Valgeirsson said...

Vil benda á að fólk á síður að vera með einhverjar órökstuddar aðdróttanir að kynhneigð fólks hér á síðunni, sérstaklega kannski þeirra sem koma síðunni eða mér persónulega ekkert við og hananú.

1:58 PM  

Post a Comment

<< Home